ਜਲੰਧਰ ਇੰਪਰੂਵਮੈਂਟ ਟਰੱਸਟ ਨੂੰ ਅਦਾਲਤ ਤੋਂ ਵੱਡਾ ਝਟਕਾ, 7 ਮਾਮਲਿਆਂ ‘ਚ ਹਾਰ; ਹੁਣ ਅਲਾਟੀਆਂ ਨੂੰ 84 ਲੱਖ ਰੁਪਏ ਅਦਾ ਕਰੇਗਾ ਟਰੱਸਟ
DD Punjab news : ਜਲੰਧਰ ਇੰਪਰੂਵਮੈਂਟ ਟਰੱਸਟ ਨੂੰ ਇਕ ਵਾਰ ਫਿਰ ਖਪਤਕਾਰ ਅਦਾਲਤ ਤੋਂ ਵੱਡਾ ਝਟਕਾ ਲੱਗਾ ਹੈ। ਟਰੱਸਟ ਦੀ ਜਾਇਦਾਦ ਨਾਲ ਸਬੰਧਤ 7 ਕੇਸਾਂ ਵਿੱਚ ਖਪਤਕਾਰ ਅਦਾਲਤ ਨੇ ਨਗਰ ਸੁਧਾਰ ਟਰੱਸਟ ਵਿਰੁੱਧ ਫ਼ੈਸਲਾ ਸੁਣਾਉਂਦਿਆਂ ਅਲਾਟੀਆਂ ਨੂੰ 45 ਦਿਨਾਂ ਦੇ ਅੰਦਰ-ਅੰਦਰ 84 ਲੱਖ ਰੁਪਏ ਅਦਾ ਕਰਨ ਦੇ ਹੁਕਮ ਦਿੱਤੇ ਹਨ। ਇਹ ਸੱਤ ਇੰਦਰਾਪੁਰਮ, ਬੀਬੀ ਭਾਨੀ ਕੰਪਲੈਕਸ ਅਤੇ ਸੂਰਿਆ ਐਨਕਲੇਵ ਐਕਸਟੈਂਸ਼ਨ ਦੇ ਹਨ। ਖਪਤਕਾਰ ਅਦਾਲਤ ਨੇ ਕਿਹਾ ਹੈ ਕਿ ਸਾਰੇ ਅਲਾਟੀਆਂ ਨੂੰ 9 ਫੀਸਦੀ ਵਿਆਜ, 30000 ਰੁਪਏ ਮੁਆਵਜ਼ਾ ਅਤੇ 5000 ਰੁਪਏ ਕਾਨੂੰਨੀ ਫੀਸ ਸਮੇਤ ਉਨ੍ਹਾਂ ਦੀ ਮੂਲ ਰਕਮ ਵਾਪਸ ਕੀਤੀ ਜਾਵੇ। ਇਨ੍ਹਾਂ ਮਾਮਲਿਆਂ ਵਿੱਚ ਅਨੁਪਮ ਸਹਿਗਲ ਦਾ ਇੰਦਰਾਪੁਰਮ ਕੇਸ ਵੀ ਸ਼ਾਮਲ ਹੈ। ਉਸ ਨੇ 4.47 ਲੱਖ ਰੁਪਏ ਦਿੱਤੇ ਸਨ। ਹੁਣ ਉਸ ਨੂੰ 12 ਲੱਖ ਰੁਪਏ ਵਾਪਸ ਮਿਲਣਗੇ।
ਨੀਰਜ ਸਹਿਗਲ ਨੇ ਇੰਦਰਾਪੁਰਮ ਵਿੱਚ ਇੱਕ ਫਲੈਟ ਲਈ 4.26 ਲੱਖ ਰੁਪਏ ਦਾ ਭੁਗਤਾਨ ਕੀਤਾ ਸੀ ਪਰ ਉਸ ਨੇ ਕਈ ਕਮੀਆਂ ਨੂੰ ਲੈ ਕੇ ਕੇਸ ਦਾਇਰ ਕੀਤਾ ਸੀ। ਉਸ ਨੂੰ 12 ਲੱਖ ਰੁਪਏ ਵੀ ਵਾਪਸ ਮਿਲ ਜਾਣਗੇ। ਇਸੇ ਤਰ੍ਹਾਂ ਸੁਰਿੰਦਰ ਕੌਰ ਨੇ ਇੰਦਰਾਪੁਰਮ ਵਿੱਚ ਫਲੈਟ ਲਈ 4.79 ਲੱਖ ਰੁਪਏ, ਪਟਿਆਲਾ ਦੇ ਰਾਜੇਸ਼ ਕੁਮਾਰ ਨੇ 4.69 ਲੱਖ ਰੁਪਏ, ਲੁਧਿਆਣਾ ਦੇ ਰਾਜੇਸ਼ ਕੁਮਾਰ ਨੇ 4.58 ਲੱਖ ਰੁਪਏ ਦਿੱਤੇ ਸਨ। ਹੁਣ ਉਨ੍ਹਾਂ ਨੂੰ ਵੀ 12-12 ਰੁਪਏ ਅਦਾ ਕਰਨ ਦੇ ਹੁਕਮ ਦਿੱਤੇ ਗਏ ਹਨ। ਜਲੰਧਰ ਦੀ ਬਲਜੀਤ ਕੌਰ ਨੇ ਬੀਬੀ ਭਾਨੀ ਕੰਪਲੈਕਸ ਵਿੱਚ ਫਲੈਟ ਲਿਆ ਸੀ ਅਤੇ 5.33 ਲੱਖ ਰੁਪਏ ਦਿੱਤੇ ਸਨ। ਉਸ ਨੇ ਕੇਸ ਵੀ ਦਰਜ ਕਰਵਾਇਆ ਸੀ ਅਤੇ ਹੁਣ ਉਸ ਨੂੰ 12 ਲੱਖ ਰੁਪਏ ਮਿਲਣਗੇ। ਇਸੇ ਤਰ੍ਹਾਂ ਵਿਕਾਸ ਕੱਕੜ ਨੇ ਸੂਰਿਆ ਐਨਕਲੇਵ ਵਿੱਚ ਇੱਕ ਪਲਾਟ ਲਿਆ ਸੀ ਅਤੇ ਉਸ ਨੇ 2.60 ਲੱਖ ਰੁਪਏ ਪੇਸ਼ਗੀ ਭੁਗਤਾਨ ਵਜੋਂ ਜਮ੍ਹਾਂ ਕਰਵਾਏ ਸਨ। ਪਰ ਉਸ ਨੂੰ ਪਲਾਟ ਨਹੀਂ ਮਿਲਿਆ। ਹੁਣ ਉਸ ਨੂੰ 4 ਲੱਖ ਰੁਪਏ ਵਾਪਸ ਮਿਲਣਗੇ।
